|
Честованя памняти Ференца Раковція ІІ.
17-го марца 2015. рока Парламент Мадярщины вуголосив день роженя Ференца Раковція ІІ. памнятным днём и сим рішенём пудкріпив ниґда не загаснучоє чувство честованя Русинами, „ gens fidelissima” памняти Великого Князя.
2 апріля 2016. рока у Шарошпатакови у паркови музея Раковція 45О русинув праздновали 340. рочницю дня роженя Великого Князя Ференца Раковці ІІ. Сято традіційно зачало ся Сятов Літурґійов у Ґрекокатолицькуй церкви Сятого Петра и Павла и продовжило ся привітственов бесїдов мера Шарошпотока Яноша Ароша, котрый акцентовав на важности сохраненя памняти Ференца Раковція ІІ. у жывотї варыша. Віра Ґіріц, посланик Русинув у Парламентї Мадяршины інформовала притомных за свуй выступ на пленарнум засїданю Парламента Мадярщины 29. марца 2016. рока., посяченый 340. юбілейови Ференца Раковція ІІ. Діректор Музея Раковція Др. Едіт Томаш у своюй бесїдї дала інтереснї факты за період жывота Великого Князя и його фамілії у Шарошпотоці. На сяточнум концертї ученикы Основнуй Школы имени Ференца Раковція ІІ. декламовали верші, посяченї Князови, а ученикы Шарошпотокської Школы Умілства порадовали притомных танцями. На законченя праздника Янош Арош, мер варыша, Віра Ґіріц, посланик Русинув у Парламентї Мадяршины, Віктор Крамаренко, предсїдатель Вседержавного Русинського Самосправованя, Олґа Сілцер-Лікович и Янош Соноцкі, замістителї предсїдателя ВРС, Янош Кожнянськый, предсїдатель Общества Русинув/Рутенув Мадярщины и Шарошпотокського Русинського Націоналного Самосправованя, предсїдатель Ревізійнуй Комісії ВРС, діректор Музея Раковція Др. Едіт Томаш и множество містных и Б-А-З теріторіалного Русинського Самосправовань возложили вінці ґу памнятникови Ференца Раковці ІІ. и русинськым гімном.
Пуд час смачного обіда участникы сята обміняли ся новинами свого жывота и дїятелности самосправовань.
Честованя дня роженя Ференца Раковція ІІ. продовжило ся довкола памнятника Великого Князя у паркови каштеля, де ся родив Раковці. Притомнї послухали выступленя Др. Шандора Енґі, завідуючого Інститута Біблійськых Наук, Лайоша Лацко, предсїдателя Цівілного Общества им. Ференца Раковція ІІ. и Яноша Кожнянського, предсїдателя Общества Русинув/Рутенув Мадярщины и Шарошпотокського Русинського Націоналного Самосправованя, предсїдателя Ревізійнуй Комісії ВРС. Сято скончило ся покладанём вінцюв ґу памнятникови Великого Князя.
|
