ВЫСЯЧЕНЯ ЄПИСКОПА У ВОЗРОЖЕНУМ ЕҐЗАРХАТЇ
16.07.2011 08:56
5 марта 2011 рока є історичнов датов у жывотї мадярськых ґрекокатоликув. У сесь день монах Атаназ Орос быв высяченый папов Бенедіктом XVI на єпископського еґзарха у Мішковцськум Еґзархатї. При сьому папа даровав му престол из Паніумськым знаком.
Атаназ Орос родив ся у родинї ґрекокатолицького сященика. Из восьмох дїти, єден брат став сящеником, сестры — попадями. Отець Атаназа Ороса — честованый межи вірниками парохії, днесь пензіста.
Атаназ Орос быв похрещеный на имня Ласло. По высяченю у сященикы вєдно из Філіпом Кочішом, днешнїм єпископом Гайдудорозького єпископата, бывав у монашеськуй общинї у белґійськум Шеветоні, пак у Дамоуцї, де и прийняв монашеськоє имня Атаназ. Теолоґічнї знаня дустав у католицькум універзитетї Петера Пазманя, пак множив свої знаня у універзитетох Рима. Пуд час высяченя на єпископа быв руководителём пудготовителного курса у Централнуй Церьковнуй Семинарії.
Мішковцськый Апостолськый Еґзархат є скорботным резултатом Тріанонського мирного диктата. Из одкапчаных теріторій, 21 парохію Пряшовського єпископата, Папа Пій XI 4 юнія 1924 рока основав Апостолськый протекторат. Се быв статус из особым церьковным правом и церьковным самосправованём. Через призначеных апостолськых адміністраторув Сятый Престол дозерать и руководить діятельностю церьковли у сюм реґіонї.
Днешнёв діспозіціёв є, же Апостолськый Еґзархат Мішковця з 59 парохіями поміщеный є межи природнёв лініёв Тисы и адміністративным гатаром Боршод-Абауй-Земплинської жупы.
Отець Атаназ Орос є первым высяченым єпископом Апостолського Еґзархата Мішковця.
У пув на сему вечара 6 марта 2011 рока у ґрекокатолицькуй церкві на Буза тере у Мішковцю, сященикы еґзархата и многочиселнї вірникы вєдно из нововысяченым єпископом Атаназом співали неділну вечурню.
Дай Боже, новоназначеному єпископу Атаназу мира, здоровля на Многая и Благая Лїта!
Жерело: exarchatus.hu, gorogkatolikus.hu